OT: Gaano ka ka-Pilipino?
Posted: Thu May 16, 2013 6:16 am
Ang mga pambansang bagay ay sumisimbolo sa pagiging makabayan at mga katangian ng bawat Pilipino at nagkaroon ng mahalagang papel sa kasaysayan ng ating bansa.
Marahil ang nakararami sa inyo ay mataas na ang antas ng kaalaman tungkol sa paksang ito.
Ngunit ang lathalaing ito ay ginawa upang magbalik-tanaw at sariwain ang mga simbolo ng ating pagka-Pilipino.
PAMBANSANG PUNO (Narra)
>Sumisimbolo sa pagiging matatag at matibay ng mga Pilipino sa anumang problemang kanilang kakaharapin. Gaya ng Narra na isa sa kilalang puno na may pinakamatibay na kahoy. Karaniwan itong ginagamit upang gumawa ng muwebles.
PAMBANSANG DAHON (Anahaw/Fan Palm)
>Sinasabing ang dahong ito ang ginagamit ng ating mga ninuno sa panahon ng tag-init.
PAMBANSANG PRUTAS (Mangga/Mango)
>Ang mangga ay sumisimbolo sa pagiging magiliw ng mga Pilipino sa kanilang mga panauhin. Gaya ng mangga na may matamis na lasa, tayo ay may maayos na pakikitungo sa ating mga bisita.
PAMBANSANG IBON (Agila ng Pilipinas/Philippine Eagle)
>Sinasabing ang Philippine Eagle ang hari ng kagubatan sa Pilipinas. Sumisimbolo sa pagiging magaling ng mga Pilipino sa pamumuno.
PAMBANSANG HAYOP (Kalabaw/Carabao)
>Sumisimbolo sa pagiging matatag at masipag ng bawat Pilipino. Na gaya ng kalabaw na ginagamit sa pagsasaka.
PAMBANSANG ISDA (Bangus/Milkfish)
>Isa sa may pinakamasarap na isda sa bansa. Sumisimbolo sa pagiging maparaan at hindi patatalo na katangian ng mga Pilipino dahil sa matinik nitong katawan.
PAMBANSANG BULAKLAK (Sampaguita/Arabian Jasmine)
>Sumisimbolo sa bawat Pilipina na marikit at maganda. Ang kulay nitong puti na sumisimbolo sa kadalisayan at ang bango nitong humahalimuyak.
PAMBANSANG PAGKAIN (Litson/Lechon)
>Ito'y pambansang pagkain kung ituring dahil sa Pilipinas lamang ito matatagpuan. Nangangailangan ito ng tiyaga at malaking bahagi ng oras upang lutuin. Ang baboy ang karaniwang ginagamit dito na sinangkapan sa loob nito ng mga pampalasa. Karaniwang ito'y inihahanda sa mga malaking salu-salo lalo na ang piyesta.
PAMBANSANG TIRAHAN (Bahay Kubo/Nipa Hut)
>Ito ang sinaunang tirahan ng ating mga ninuno. Pinagbuhusan ng lakas ng katawan upang makabuo ng ganitong uri ng tahanan.
PAMBANSANG SAYAW (Tinikling/Bamboo Dance)
>Sumisimbolo sa pagiging mailap at maparaang katangian ng mga Pilipino noong unang panahon dahil sa pananakop ng mga Kastila. Karaniwang sinasayaw ng babae at lalaki.
PAMBANSANG KASUOTANG PANLALAKI (Barong Tagalog/Tagalog Dress)
>Sumisimbolo sa pagiging malikhain ng mga Pilipino. Noong unang panahon, karaniwang gawa ito sa hinabing dahon ng pinya o abaka.
PAMBANSANG KASUOTANG PAMBABAE (Baro't Saya/Blouse and Skirt)
>Sumisimbolo sa pagiging malikhain ng mga Pilipino. Nagkakaroon na nga ibat'-ibang mukha at uri ang kasuotang ito habang naglalaon na sinusuot na lamang tuwing may okasyon. Noong unang panahon, karaniwang gawa ito sa hinabing dahon ng pinya o abaka.
PAMBANSANG LARO (Sipa/Sipa Game)
>Ito ang laro at paraan ng palakasan ng ating mga ninuno. Kinakailangan ang lakas at determinasyon upang hindi bumagsak ang sipa sa lupa.
PAMBANSANG BAYANI (Jose P. Rizal)
>Kinikilala siya sa husay sa pagsusulat na naging susi upang mag-aklas at pukawin ang kaisipan ng mga Pilipino laban sa mga Espanyol. Hindi siya gumamit ng dahas o armas upang lumaban sa mga mananakop.
PAMBANSANG SASAKYAN (Kalesa/Horse Drawn Carriage)
>Ito ang sinaunang sasakyan ng mga Pilipino noong unang panahon. Isang kabayo ang humihila upang dalahin ang tao at mga bagahe nito sa kanilang destinasyon.
PAMBANSANG SAPIN SA PAA (Bakya/Wooden Sandal)
>Ito ang sinaunang sapin sa paa ng mga kababaihan. Sumisimbolo rin ito sa pagiging malikhain ng mga Pilipino. Karaniwang ito'y ginagawa sa pamamagitan ng pag-ukit at pinaglaanan ng oras upang makabuo ng isang pares nito.
PAMBANSANG AWIT (Lupang Hinirang/Chosen Land)
>Ito ang awit na sumisimbolo sa ating pagka-Pilipino. Isinasalaysay dito ang mga saloobin at adhikaing magkaroon ng kasarinlan ang bansang Pilipinas.
Nang dahil sa modernong panahon at makabagong teknolohiya, marahil ang nakararami sa atin ay unti-unti o di kaya'y nakalimutan na ang mga bagay sa itaas.
Maaari kayong magdagdag pa ng mga bagay na sa tingin niyo'y aking nakaligtaan.
Nawa'y naibigan niyo ang paksang ito.
Maraming salamat po.
Ang mga larawan sa itaas ay hindi ko pag-aari.
Kredito sa mga may-ari nito.